Üzeyir Hacıbəyli adına Bakı Musiqi Akademiyasının 100 illiyi münasibətilə

Azərbaycan musiqi elminin qiymətli abidələri sırasına daxil olan bu kitab janrı və yazılış tərzi etibarı ilə daha əvvəllərdə bənzəri olmamış ciddi tədqiqat əsəridir. Azərbaycanın musiqişünaslıq leksikoqrafiyasına aid birinci kitab olmaqla yanaşı bu əsər yalnız musiqi terminologiyasına dair məlumatları əhatə etmir. Ensiklopedik bilik sahibi olan müəllif Azərbaycan folkloru, etnoqrafiyası və mədəniyyət tarixinin müxtəlif sahələri barədə az bəlli olan səhifələri işıqlandırır. Azərbaycan musiqişünaslığı və muğam ifaçılığının bir sıra görkəmli simaları haqqında kitabda müəllifin ilk məxəzlərin araşdırılmasına, eləcə də öz şəxsi müşahidələri və yaddaşlarına əsaslanan əhəmiyyətli mülahizələri yer almışdır. Kitabın müəllifi, görkəmli Azərbaycan bəstəkarı və dirijoru, musiqişünas və şərqşünas Əfrasiyab Bədəlbəylinin birinci dəfə 1969-cu ildə nəşr edilmiş "İzahlı monoqrafik musiqi lüğəti" musiqi maarifçiliyi istiqamətində yarım əsrə yaxın bir müddətdə mühüm faydalar verməklə bərabər Azərbaycan muğamşünaslığının ilk mənbələr əsasında öyrənilişinə də müsbət təsirini göstərmişdir.

Əsər musiqişünaslar, musiqiçi və musiqişünas ixtisası verən universitetlərin tələbələri, orta ixtisas musiqi məktəblərinin, eləcə də orta ümumtəhsil məktəblərinin şagirdləri, həmçinin geniş oxucu kütləsi üçün nəzərdə tutulmuşdur.