"Azərbaycan dili və nitq mədəniyyəti" dərsliyi iki cilddən ibarətdir. I cilddə Azərbaycan dili haqqında ümumi məlumat verilir, Azərbaycan əlifbası, dilimizin başqa türk dilləri içərisində mövqeyi müəyyənləşdirilir, fənnin əsasları, məqsəd və vəzifələri, mədəni amilləri, natiqlik sənəti tarixi, folklorun nitq mədəniyyətinin özəyi olması və s., II cilddə Azərbaycan ədəbi dilinin normalar sistemi, nitq parçalarının fonosemantik əlamətləri, ümumişlək, milli, alınma sözlər, aktiv və passiv leksika, durğu işarələri, yazılı və şifahi nitq, mədəni nitqin əsas keyfiyyətləri, növləri, etik məsələləri və s.-dən bəhs olunur.

Bu fənnin məktəbdə tədris olunmasında əsas məqsəd tələbələrin yazılı, şifahi nitqini inkişaf etdirmək, onlara düzgün danışıq və yazı vərdişlərini aşılamaq, nitq mədəniyyətinin elmi əsaslarını, ədəbi dil normalarını ( fonetik, leksik, qrammatik, sematik, sintaktik, və s. ) öyrətməkdir. Nitq mədəniyyəti mənəvi sərvət, başqa elmlərə açardır. Başqa elmlərlə əlaqəsi onlarla birlikdə tədqiq olunmasına gətirib çıxarır. Ona görə də bu dərslik ali məktəblərin bütün ixtisasları üçün nəzərdə tutulmuşdur.